Khutbah Jumat Bahasa Sunda: Metik Pelajaran tina Kisah Qorun anu Koret jeung Sombong 

Siapa yang tidak pernah mendengar nama Qorun yang melegenda hingga sekarang. Sayang, kepopuleran nama Qorun bukan karena kebaikannya, melainkan kekikiran dan kesombongannya. Khutbah ini mengajak kita menyimak bagaimana kisah Qorun yang diceritakan Al-Quran dan dijelaskan para ulama tafsir. Semoga melalui kisah ini, kita pandai memetik pelajaran penting di dalamnya.

Teks khutbah berikut ini berjudul “Khutbah Jumat Bahasa Sunda: Metik Pelajaran tina Kisah Qorun anu Koret jeung Sombong“. Untuk mencetak naskah khutbah ini, silakan klik ikon print berwarna merah di atas atau bawah artikel ini (pada tampilan desktop). Semoga bermanfaat! (Redaksi)

Khutbah I

اَلْحَمْدُ للهِ الَّذِيْ فَتَحَ لِأَوْلِيَائِهِ أَبْوَابَ الْخَيْرَاتِ، وَأَسْبَغَ عَلَيْهِمُ الْهِبَاتِ الْوَاسِعَةِ وَالْمَبَرَّاتِ، وَخَذَلَ الْمُعْرِضِيِنً عَنْهُ، فَبَقِيَتْ قُلُوبُهُمِ فِي الظُّلَمِ وَالضَّلَالَاتِ، وَأَشْهَدُ أَنْ لَا إِلَهَ إِلَّا اللهُ فَاطِرُ الْأَرْضِ وَالسَّمَاوَاتِ، اَلْغَنِيُّ بِذَاتِهِ، اَلْمُغْنِي لِجَمِيْعِ الْمَخْلُوْقَاتِ، وَأَشْهَدُ أَنَّ مُحَمَّدًا عَبْدُهُ وَرَسُوُلُهُ أَكْمَلُ الْبَرِيَاتِ. اَللَّهُمَّ صَلِّ وَسَلِّمْ عَلَى مُحَمَّدٍ وَعَلَى آلِهِ وَأَصْحَابِهِ أَوْلَي الْفَضَائِلِ وَالْكَرَامَاتِ

أَيُّهَا النَّاسُ، اِتَّقُوا اللهَ تَعَالَى بِإِصْلَاحِ الْبَوَاطِنِ وَالظَّوَاهِرِ، وَتَقَرَّبُوا إِلَى رَبِّكُمْ بِطَيِّبِ الْمَقَاصِدِ وَحُسْنِ السَّرَائِرِ. قَالَ تَعَالَى: ﴿إِنَّ قَارُونَ كَانَ مِنْ قَوْمِ مُوسَى فَبَغَى عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ إِذْ قَالَ لَهُ قَوْمُهُ لَا تَفْرَحْ إِنَّ اللَّهَ لَا يُحِبُّ الْفَرِحِينَ﴾، وَقَالَ النَّبِيُّ صَلَّى اللهُ عَلَيْهِ وَسَلَّمَ : الْكِبْرِيَاءُ رِدَاءُ اللَّهِ، فَمَنْ نَازَعَ اللَّهَ رِدَاءَهُ قَصَمَهُ، صَدَقَ اللهُ الْعَظِيْمِ وَصَدَقَ رَسُوْلُهُ الْحَبِيْبُ الْكَرِيْمِ وَنَحْنُ عَلَى ذَلِكَ مِنَ الشَّاهِدِيْنَ وَالشَّاكِرِيْنَ، أَمَّا بَعْدُ

Sidang jumah anu dimulyakeun ku Alloh 
Alhamdulillah, puji sareng syukur urang panjatkeun ka Dzat Anu Maha Agung, Alloh swt. Dzat Anu Maha Ngatur sareng teu weleh-weleh maparin ni’mat ka sadaya makhluk-Na kalebet urang sadayana, sahingga dina waktos ieu urang tiasa kempel berjamaah dina raraga ngalaksanakeun sholat Jumah berjamaah. Mugia langkah sareng amaliah urang dina danget ieu sing kenging rohmat sareng rido Mantenna.

Solawat sareng salam anu utami mugi tetep ka pang afdol-afdolna nabi, nyaeta Kangjeng Nabi Muhammad saw. Salaku pamingpin para nabi sareng rosul, panutan sakaligus rohmat ka sadaya alam. Sholawat sareng salam oge mugi dicurahkeun ka para sahabatna, para tabiin tabiatna, dugika urang sadayana salaku umatna anu sapapaosna miharep syafaatna di yaomil jaza.

Hadirin anu mulya 
Ngalangkungan ieu minbar, khotib ngahaturkeun wasiat khusus ka diri pribadi, umum ka sidang jumah sadayana, hayu urang sami-sami ningkatkeun katakwaan ka Alloh swt. Sabab, teu aya deui bekel anu pang sae-saena nyorang kahirupan dunya sareng akherat anging katakwaan. Oge teu aya jalmi anu pang mulya-mulyana mungguh Alloh anging jalmi anu takwa.

Hartosna takwa nyaeta takwa anu janten kagindingan keur kaimanan, takwa anu janten pangiat dina raraga ngalaksanakeun sagala rupi parentah Alloh, sareng nebihan sagala rupi larangan-Na. Mudah-mudahan urang sadayana kalebetkeun jalmi takwa anu sapapaosna kenging pitulung, taufiq, sareng hidayah kanggo ngabakti ka Anjeuna. Amin ya robbal alamin.

Hadirin rohimalimulloh    
Saha anu teu pernah ngadangu nami Qorun atanapi Karun. Hiji jalmi kaya raya anu aya di zaman Nabi Musa, namina ngalegenda dugika ayeuna, kisahna diabadikeun dina Al-Quran, malahan janten babasaan di tengah masyarakat kanggo ngagambarkeun jalma anu mirip sareng tabiatna atanapi kanggo nganisbatkeun harta anu kapendak dina taneuh. Ku urang sok rajeun kadangu, “Dasar Qorun,” atanapi “Eta mah harta Karun”. Dua babasaan eta mungkin anu paling sering ku urang kadangu.

Hanjakal, katenaran nami Qorun sanes dina kahadeannana, tapi dina kasombongan, kakoretan, sareng nasib tragis anu dirandapananna. Teras naon atuh atuh nganteurkeun kana kasombongan Qorun teh?

Lamun seug nelaah ayat-ayat anu ngisahkeunnana, sabab kasombongan Qorun teh nyaeta harta kakayaan anu kacida lobana. Manehna poho ka Pangeran anu masihannana. Tibatan syukur, Qorun malah adigung, koret, jeung nangtang ka Pangeran. Kitu pisan sakumaha nu digamarkeun ku Al-Quran:

 
إِنَّ قَارُونَ كَانَ مِنْ قَوْمِ مُوسَى فَبَغَى عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ إِذْ قَالَ لَهُ قَوْمُهُ لَا تَفْرَحْ إِنَّ اللَّهَ لَا يُحِبُّ الْفَرِحِينَ

Hartosna, “Saenya-enyana Qorun teh kaasup kaum Qorun. Ngan Qorun kaleuleuwihi ka maranehna.  Jeung Kaula nganugrahkeun ka manehna gudang-gudang harta anu konci-koncina kacida beurat dipanggul ku sajumlah jalma-jalma anu kuat,” (QS. Al-Qoshosh [28]: 76).

Disebatkeun ku Ibnu Juraij, nami lengkep Qorun anu kacida beunghar teh nyaeta Qorun bin Yash-har bin Qohits bin Lawi bin Ya’qub. Manehna putra paman atanapi misanna Nabi Musa alaihissalam. Nabi Musa nyalira nyaeta putra Imron, sedengkeun Imron putrana Qohist. Ku hal sakitu, Qorun teh masih saaki sareng Nabi Musa alaiahissalam, nyaeta Qohits.

Kakayaan Qorun kacida poharana. Ku loba-lobana, sababaraha jalma anu kuat teu kadugaeun mawa konci-konci gudangna. Dina riwayat Khoitsamah diuningakeun, keur ngangkut konci gudang harta Qorun, dibutuhkeun 60 bighol atawa kuda leutik. Ukuran koncina sagede jari. Bahanna tina kulit. Jeung satiap konci digunakeun keur hiji gudang. Walhasil, pisakumahaeun lobana rajakaya Qorun! Kitu sakumaha anu disebatkeun dina Tafsir Ath-Thabari jilid 19 halaman 617.

Hadirin kaom Muslimin rohimakumulloh 
Ngan di balik kakayaannana, Qorun teh hiji jalma anu kacida sombong jeung resep pamer harta. Nya eta pisan anu dicarioskeun ku Al-Quran, sakumaha dina ayat, “Maka kaluar Qorun manggihan kaumna dina kamewahannana.” 

Para ulama tafsir ngajelaskeun, nalika kaluar, Qorun make pakean mewah diiring ku tilu ratus gadis nganggo baju beureum jeung 4 rebu kanaraan kuda. Teu heran iring-iringan Qorun teh ngondang kumecrek na jalma-jalma anu kebongbroy ku harta banda, sakumaha anu diuningakeun dina ayat Al-Quran, “Muga-muga urang ngabogaan harta saperti anu tos dibikeun ka Qorun. Saenya-enyana, manehna bener-bener meunangkeun kauntungan anu gede,” (QS. Al-Qoshosh [28]: 79).

Ngan teu saeutik oge kaumna anu mere peringatan, “Ulah rek kaliwat bangga anjeun. Saenya-enyana Alloh teu mikaresep ka jalma anu kaliwat ngabanggakeun diri.”

Sapalihna ulama nganafsirkeun, istilah ngabanggakeun diri dina ayat eta hartosna takabur, dzolim, nyieun karuksakan, jeung teu syukur kana ni’mat, jeung poho kanu mere ni’mat.

Kalih ti eta, Qorun teh jalma beunghar ngan kacida koretna jeung tara daek zakat. Hal ieu sakumaha anu didugikeun ku Ibnu Abbas. Kacarioskeun, nalika datang parentah zakat, Nabi Musa sok sumping ka Qorun sareng marentahkeun zakat anu seueurna sadinar tina satiap sarebu dinar hartana, sadirham tina satiap sarebu dirham, hiji doma tina satiap satiap sarebu dombana, sareng saterasna.

Saparantos Qorun ngitung sakabeh hartana, ternyata jumlah zakatna kacida lobana. Kakoretan jeung karesep kana dunyana mulai ngahalangan hatena keur ngaluarkeun zakat. Tibatan ngaluarkeun zakat, malah ngumpulkeun sababaraha urang Bani Israel keur ngagogoreng Nabi Musa alaihissalanm. Manehna cacarita ka kaum Bani Israel, “Salila ieu maraneh ngawaro kana parentah Musa. Naha aranjeun teu nyaho yen Musa rek nyokot harta aranjeun?” Langsung dijawab ku kaum Bani Israel, “Salira teh sesepuh kaula sadaya. Maka pek wae parentah kaula naon wae anu anu dipikahoyong ku salira.”  Kitu sakumaha anu diuningakeun dina kitab Ruhul Bayan, jilid 6, halaman 435.

Hadirin sadayana
Akibat kasombongan, katakaburan, jeung kakoretanna, Qorun dilelepkeun kana bumi. Kitu sakumaha diuningakeun dina Al-Quran:

فَخَسَفْنَا بِهِ وَبِدَارِهِ الْأَرْضَ فَمَا كَانَ لَهُ مِنْ فِئَةٍ يَنْصُرُونَهُ مِنْ دُونِ اللَّهِ وَمَا كَانَ مِنَ الْمُنْتَصِرِينَ

Hartosna, “Maka Kaula ngalelepkeun Qorun sareng imahna kana jero bumi. Teu aya hiji golongan oge anu nulungan manehna tina adzab Alloh. Jeung manehna teu kaasup golongan jalma-jalma anu bisa melaan diri,” (QS. Al-Qoshosh [28]: 81).

Waktu harita, Alloh nurunkeun wahyu ka Nabi Musa alaihissalam keur marentah bumi naon wae anu dipiharep ku anjeuna. Nalika Nabi Musa alaihissalam datang dina kaayaan ngambek, Qorun langsung menta tulung, “He Musa, tulungan kaula.” Ngan Nabi Musa teu lemek teu nyarek. Anjeuna teras sasauran ka bumi, “He bumi, legleg wae Qorun teh jeung anak buahna.” Harita kenah, imah Qorun mulai ngageter. Qorun jeung antek-antekna mimiti ngalelep  dilegleg ku bumi dugika semet tu’urna. Lalaunan imahna oge ngilu ngalelep sajero tu’ur.

Qorun menta tulung deui, “Sing karunya ka kaula, Musa!” Sementawis imahna ngarieg deui. Ayeuna Qorun jeung batur-baturna ngalelep deui mingkin jero nepika semet bujal. Nyakitu keneh imahna. Qorun terus jejeritan, “Musa, sing karunya ka kaula.” Sementawis Nabi Musa kalah ka nyuhunkeun  bumi keur ngalegleg Musa, “He bumi, lelepkeun wae eta Qorun.” Imah Qorun oge ngarieg deui. Sementara Qorun jeung batur-baturna kalah mingkin jero tilelep nepika semet tikoro. Nyakitu keneh imahna. Qorun terus jejeritan ka Nabi Musa, “He Musa, sing karunya ka kaula.” Ngan Nabi Musa, teu malire. Anjeuna terus menta bumi keur ngalegleg Qorun jeung batur-baturna. Dugi ka akhirna mah Qorun teh ngiles dilegleg bumi.

Teu lami ti harita, kadangu aya sora, “He Musa, naon anu ngakibatkeun manehna saperti kitu? Padahal, demi kamulyaan Kaula, lamun Qorun ngadu’a ka Kaula, pasti ku Kaula bakal dirohmat.” Kitu sakumaha anu dikutip tina kitab Tafsir Ibni Abi Hatim.

Saur Ibnu Abbas, dugika poe kiamah, Qorun bakal dilelepkeun kana bumi malahan terus dugika lapisan katujuh. Sementawis Ibnu Juraij nyebatkeun, unggal poe Qorun bakal dilelepkeun satangtung awakna. Ngan, sanajan dugika poe kiamah, manehna moal nepi kana lapisan pang handapna. Kitu pisan sakumaha katerangan dina kitab al-Hidayah ila Bulughil-Hidayah.

Hadirin sadayana
Tina kisah anu dicaritakeun nembe, aya sababaraha pelajaran penting anu tiasa dipetik ku urang sadayana. Kahiji, Alloh kacida teu resepeunnana ka jalma anu koret sareng sombong. Naon pangna kitu, sabab kasombongan teh kagindingan Alloh, sakumaha anu diuningakeun ku hadis nu aya dina muqodimah.

Kadua, jalma koret jeung sombong teu dipika resep ku papada jalma. Mun seug jalma teu dipika resep ku papada jalma, maka bakal loba anu ngajauhan jeung moal aya nu malire nalika aya pangabutuh.

Katilu, harta jeung jabatan ukur titipan Alloh. Sahingga jalma mu’min mah kedah sadar yen nalika Alloh ngersakeun, eta titipan bakal dicandak. Matak ulah adigung jeung sombong. Tetep kudu tawadu jeung handap asor ka papada jalma. Anggur mah mangfaatkeun eta amanat teh kanggo nulung sasama.

Kaopat, adzab Alloh dina nabi-nabi kapungkur langsung diturunkeun ka jalma-jalma anu doraka. Benten ka umat Kangjeng Nabi Muhammad, ku welas asihna Alloh swt ka aranjeuna, adzab jeung siksaan ditangguhkeun sugan eta umat teh tarobat. Dina henteuna eta adzab teh dilungsurkeun di alam akherat anu mangrupakeun poe pangbalesan.

Hadirin sidang Jumah anu mulya 
Ku hal sakitu, hayu urang bersihan diri urang tina sifat sombong, adigung, jeung nangtang kana parentah Pangeran. Ulah koret kana hak harta urang, yakne zakat, infaq, sareng sodaqoh. Sabab, harta urang sadayana titipan Alloh, kedah dikaluarkeun sabagiannana kanggo jalma-jalma anu teu mampu, keur ngajauhkeun sifat pelit, sakaligus wujud kataatan urang ka Alloh swt.

Khutbah II

اَلْحَمْدُ لِلَّهِ الَّذِيْ أَمَرَنَا بِاْلاِتِّحَادِ وَاْلاِعْتِصَامِ بِحَبْلِ اللهِ الْمَتِيْنِ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَشَرِيْكَ لَهُ، إِيَّاهُ نَعْبُدُ وَإِيَّاُه نَسْتَعِيْنُ. وَأَشْهَدُ أَنَّ مُحَمَّدًا عَبْدُهُ وَرَسُوْلُهُ، اَلْمَبْعُوْثُ رَحْمَةً لِلْعَالَمِيْنَ. اَللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِهِ وَأَصْحَابِهِ أَجْمَعِيْنَ. اِتَّقُوا اللهَ مَا اسْتَطَعْتُمْ وَسَارِعُوْا إِلَى مَغْفِرَةِ رَبِّ الْعَالَمِيْنَ. إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَاأَيُّهاَ الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا .. وَصَلَّى الله عَلَى سَيِّدَنَا وَمَوْلَانَا مُحَمَّدٍ وَعَلَى آلِهِ وَصَحْبِهِ وَسَلَّمَ

اَللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِوَالْمُسْلِمِيْنَ وَ الْمُسْلِمَاتِ اَلاَحْيَاءِ مِنْهُمْ وَالْاَمْوَاتْ إِنَّكَ سَمِيْعٌ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ بِرَحْمَتِكَ يَا اَرْحَمَ الرَّحِمِيْنَ

اللَّهُمَّ إِنَّا نَعُوذُ بِكَ مِنْ عَذَابِ جَهَنَّمَ وَنَعُوذُ بِكَ مِنْ عَذَابِ الْقَبْرِ وَنَعُوذُ بِكَ مِنْ فِتْنَةِ الْمَسِيحِ الدَّجَّالِ وَنَعُوذُ بِكَ مِنْ فِتْنَةِ الْمَحْيَا وَالْمَمَاتِ، اللَّهُمَّ إِنَّا نَعُوذُ بِكَ مِنْ الْهَمِّ وَالْحَزَنِ وَنَعُوذُ بِكَ مِنْ الْعَجْزِ وَالْكَسَلِ وَ نَعُوذُ بِكَ مِنْ الْجُبْنِ وَالْبُخْلِ وَنَعُوذُ بِكَ مِنْ غَلَبَةِ الدَّيْنِ وَقَهْرِ الرِّجَالِ  رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ

عِبَادَ اللهِ، إِنَّ اللهَ يَأْمُرُكُمْ بِالْعَدْلِ وَاْلإِحْسَانِ وَإِيتَآئِ ذِي الْقُرْبَى وَيَنْهَى عَنِ الْفَحْشَآءِ وَالْمُنكَرِ وَالْبَغْيِ يَعِظُكُمْ لَعَلَّكُمْ تَذَكَّرُوْنَ. فَاذْكُرُوا اللهَ الْعَظِيْمَ يَذْكُرْكُمْ وَادْعُوْهُ يَسْتَجِبْ لَكُمْ وَلَذِكْرُ اللهِ أَكْبَرُ

Ustadz M Tatam Wijaya, Penyuluh dan Petugas KUA Sukanagara-Cianjur, Jawa Barat.